ജീവിത വിശുദ്ധിയോടെ പ്രസംഗിക്കുക

                                             പാസ്റ്റർ സന്തോഷ് ഇടക്കര 

ദൈവത്തിന്റെ നാമം ഉപയോഗിച്ച് വേദിയിൽ നിൽക്കുന്നവരേ, ഈ സന്ദേശം നിങ്ങളുടെ കഴിവുകളെ ചോദ്യം ചെയ്യാനല്ല — നിങ്ങളുടെ ഹൃദയത്തെ ഉണർത്താനാണ്. 

      നിങ്ങളുടെ ശബ്ദം ശക്തമായിരിക്കാം. നിങ്ങളുടെ പ്രസംഗം ജനങ്ങളെ കരയിപ്പിക്കാം. നിങ്ങളുടെ വാക്കുകൾ ജനപ്രിയമായിരിക്കാം. പക്ഷേ ദൈവം ചോദിക്കുന്ന ചോദ്യം മറ്റൊന്നാണ്: “നിന്റെ ജീവിതം എന്റെ മുമ്പിൽ ശുദ്ധമാണോ?”

      യേശുക്രിസ്തു തന്റെ പരസ്യ ശുശ്രൂഷയിൽ, ഏറ്റവും കഠിനമായ വാക്കുകൾ ഉപയോഗിച്ചത് പാപികളോട് അല്ല - കപടഭക്തിക്കാരോട് ആയിരുന്നു. പുറത്തു വിശുദ്ധിയുടെ രൂപം, ഉള്ളിൽ അനുസരണക്കേട് — ഇത് ദൈവഹൃദയത്തെ വേദനിപ്പിക്കുന്നു.

       ജീവിതമില്ലാത്ത പ്രസംഗം ആത്മീയ വഞ്ചനയാണ്. ജീവിത വിശുദ്ധിയില്ലാത്ത ശുശ്രൂഷ ദൈവത്തിനും ദൈവസഭയ്ക്കും അപമാനവും ഭാരവും ആണ്. ജീവിതത്തിൽ ക്രമീകരണം ഇല്ലാതെയും സാക്ഷ്യം ഇല്ലാതെയും രഹസ്യ പാപങ്ങളോടുകൂടെ ക്രിസ്തുവിനെ പ്രസംഗിക്കുന്നത് ദുഷിപ്പ് ഉളവാക്കുന്നതാണ്. അത് തികച്ചും അപകടകരമാണ്. ഒന്ന് ചിന്തിക്കുക :

     നിങ്ങൾ ജനങ്ങളെ ദൈവസന്നിധിയിലേക്ക് വിളിക്കുമ്പോൾ, നിങ്ങൾ തന്നെയാണോ ദൈവത്തിന്റെ സന്നിധിയിൽ നിൽക്കുന്നത്?

    നിങ്ങൾ വിശുദ്ധിയെക്കുറിച്ച് പ്രസംഗിക്കുമ്പോൾ, നിങ്ങളുടെ രഹസ്യജീവിതം സാക്ഷ്യം പറയുന്നുണ്ടോ? നിങ്ങൾ സമർപ്പണം ആവശ്യപ്പെടുമ്പോൾ, നിങ്ങളുടെ ഹൃദയം പൂർണ്ണമായി സമർപ്പിതമാണോ?ദൈവം മനുഷ്യരുടെ കൈയ്യടിയിൽ ആകർഷിക്കപ്പെടുന്നില്ല. അവൻ ഹൃദയത്തിന്റെ നിഷ്കളങ്കതയിലാണ് സന്തോഷിക്കുന്നത്.

ഇത് ഭീഷണി അല്ല — മുന്നറിയിപ്പാണ്.

ഇത് വിധി അല്ല — മാനസാന്തരത്തിനുള്ള അവസരമാണ്. ഇപ്പോൾ തന്നെ അഭിനയം നിർത്തുക. വേദിയിൽ നിന്നിറങ്ങുക. ക്യാമറകൾക്കും കൈയ്യടികൾക്കും മുന്നമേ ദൈവസന്നിധിയിൽ മുട്ടുകുത്തുക. മാനസാന്തരം ദൗർബല്യം അല്ല; അത് ആത്മീയ ധൈര്യമാണ്. പൊതുവിൽ നേടിയെടുക്കുന്ന വിജയത്തേക്കാൾ വിലപ്പെട്ടത് രഹസ്യ ജീവിതത്തിൽ ഉള്ള വിശുദ്ധിയാണ്. അതാണ് സർവ്വ ശക്തൻ നോക്കുന്നത്.

    ഓർക്കുക — ദൈവത്തിന്റെ വചനം പ്രസംഗിക്കുന്ന വ്യക്തി ആദ്യം അതിന്റെ കീഴിൽ ജീവിക്കണം. ജീവിച്ചു തെളിയിക്കണം. അല്ലായെങ്കിൽ ഒരുദിവസം ആ വചനം തന്നെ നമ്മെ ന്യായം വിധിച്ച് ചോദ്യം ചെയ്യും.

    ജീവിതം ശുദ്ധമായാൽ പ്രസംഗം ശക്തമാകും. ജീവിതം വിശ്വസ്തമായാൽ ശുശ്രൂഷ സ്വാധീനം ചെലുത്തുവാൻ ഇടയാകും.

'പ്രസംഗിച്ചു ജീവിക്കുകയല്ല, ജീവിച്ചു പ്രസംഗിക്കുകയാണ് വേണ്ടത്.' സർവ്വശക്തനായ ദൈവമാഗ്രഹിക്കുന്നതും അതുതന്നെ.

-------------------------------------------------------------------