കവിത പ്രളയം (വിനോദ് ഏബ്രഹാം, ദുബായ്)

 

പ്രളയം 

പുഴ ദുഃഖിതയായിരുന്നു...

തൻ്റെ മൃദുമേനിയെ പാലങ്ങളും

ബണ്ടുകളും ക്ഷതമേൽപ്പിച്ചു.

തൻ്റെ സുഗമ യാത്രകൾക്ക് 

ഡാമുകളും തടയണകളും

സദാചാര വിലക്കേർപ്പെടുത്തി

കിന്നാരം പറഞ്ഞിരുന്ന ചെറു-

മീനുകളെ ഫാക്ടറികളിലെ 

വിഷജലം കൊന്നൊടുക്കി

സഖികളായ തീരവൃക്ഷങ്ങളെ

വേരോടെ മുറിച്ചുനീക്കി

മരങ്ങളിലെ കിളിനാദവും

കാറ്റിൻ്റെ തലോടലും നിലച്ചു

അങ്ങനെ അന്നൊരുദിനം

അവളുടെ മൗനദുഃഖങ്ങൾ 

നിലവിളിയായി കണ്ണീരായി

എല്ലാ അതിരുകളും ലംഘിച്ച്

കരയാകെ കവിഞ്ഞൊഴുകി.

------------------------------------------------------------------